Şirvan Dövlət Rəsm Qalereyası tərəfindən gənclər evində Aysun Ağamalıyevanın “Mənim çiçəkli palitram” adlı ilk fərdi yaradıcılıq sərgisi təşkil olunmuşdur. Sərgidə istedadlı və ümidverici yeniyetmə rəssamın sulu boya və quaşla kağız üzərində işlənmiş otuz rəsmi nümayiş etdirilmişdir. Tamaşaçılar Şirvan şəhər Uşaq Musiqi məktəbi şagirdlərinin violində ifa etdiyi lirik musiqi əsərləri fonunda sərgidə nümayiş etdirilən rəsmlərlə tanış olmuşlar.

         Səkkizinci sinifdə təhsil alan on üç yaşlı Aysun Ağamalıyeva bir neçə ildir ki, Şirvan Dövlət Rəsm Qalereyasında fəaliyyət göstərən rəsm dərnəyinin üzvüdür. Dərnək rəhbəri Çinarə Vəliyevanın fikrincə gələcəkdə yaxşı rəssam olmaq üçün Aysunda potensial istedad vardır. Təsviri incəsənətdə ilk addımlarını atan Aysunun sərgidə nümayiş olunan rəsmləri bunu bir daha sübut etmişdir.

         Sərginin açılışı zamanı Şirvan Dövlət Rəsm Qalereyasının direktoru Çinarə Vəliyeva rəssamlıq yaradıcılığı sahəsində uğurlarına və yetişməkdə olan nəslin estetik dünyagörüşünün formalaşmasına şəxsi nümunəsi ilə müsbət təsir göstərdiyinə görə Aysun Ağamalıyevaya fəxri fərman təqdim etmişdir.