Sabirabad rayon İcra Hakimiyyəti və Mil-Muğan Regional Mədəniyyət İdarəsinin birgə təşkilatçılığı ilə Sabirabad rayon Heydər Əliyev Mərkəzində “Konstitusiya və Suverenlik ili”nə həsr olunmuş “Hüquqi və suveren dövlətin banisi – Ümummilli Lider Heydər Əliyev” adlı dəyirmi masa təşkil olunub.

Tədbirdə Sabirabad rayon İcra Hakimiyyətinin və Mil-Muğan Regional Mədəniyyət İdarəsinin rəhbərliyi, YAP Sabirabad rayon təşkilatının, Mil-Muğan Regional Gənclər və İdman İdarəsinin və Sabirabad Gənclər Evinin əməkdaşları, mədəniyyət işçiləri və rayon gəncləri iştirak ediblər.

Tədbiri giriş sözü ilə açan Sabirabad Rayon İcra Hakimiyyətinin başçısının birinci müavini Həsən Həsənov çıxışında Azərbaycan Respublikasının Konstitusiyasının tarixi haqqında ətraflı məlumat verərək bildirib ki, Ulu Öndər Heydər Əliyevin rəhbərliyi ilə qəbul edilən bu sənəd hüquqi dövlətçiliyin və suverenliyin əsasını təşkil edir.

Mil-Muğan Regional Mədəniyyət İdarəsinin rəisi Nadir Quliyev çıxışında Ümummilli Liderin dövlət quruculuğu sahəsindəki müstəsna xidmətlərindən danışaraq, müstəqil Azərbaycanın ilk Konstitusiyasının Azərbaycan dövlətçiliyinin möhkəmlənməsi istiqamətində atılan ən böyük addımlardan biri olduğunu vurğulayıb.

Digər çıxış edənlər Ümummilli Lider Heydər Əliyevin müstəqil Azərbaycan Konstitusiyasının müəllifi olduğunu bir daha qeyd edərək bu mühüm sənədin xalqımızın hüquq və azadlıqlarının qorunmasında əvəzsiz rol oynadığını qeyd ediblər.