Hophopnamə Kitab Mərkəzində Mil-Muğan Regional Mədəniyyət İdarəsi, Regional Gənclər və İdman İdarəsi, Mədəniyyət İşçiləri Həmkarlar İttifaqının Sabirabad Rayon Komitəsi və Gənclərin İnkişaf və Karyera Mərkəzinin Mil-Muğan regional nümayəndəliyinin birgə təşkilatçılığı ilə 12 avqust – Beynəlxalq Gənclər Günü münasibətilə tədbir keçirilib.

Tədbirdə Mil-Muğan Regional Mədəniyyət İdarəsinin rəis müavini Telman Əzimov, Regional Gənclər və İdman İdarəsinin rəis vəzifəsi müvəqqəti icra edən Elçin Qiyasov çıxış edərək gənclərin ölkəmizin inkişafında oynadığı mühüm roldan, dövlət tərəfindən gənclərin təhsil, məşğulluq, mədəniyyət və idman sahələrində dəstəklənməsi istiqamətində görülən işlərdən bəhs ediblər. Bildirilib ki, hər il 12 Avqust tarixində qeyd olunan Beynəlxalq Gənclər Günü BMT tərəfindən gənclərin problemlərinə diqqət çəkmək və onların potensialını üzə çıxarmaq məqsədilə təsis edilib.

Çıxışlardan sonra Gənclərin İnkişaf və Karyera Mərkəzinin könüllülük proqramı çərçivəsində təcrübə keçən və kursu uğurla bitirən gənclər təltif olunub. Həmçinin, tədbir iştirakçıları arasında keçirilən viktorinada suallara düzgün cavab verən gənclərə hədiyyələr təqdim edilib.

Region musiqiçilərinin ifasında rəngarəng musiqi proqramı ilə davam edən tədbirdə iştirakçılar üçün çay süfrəsi təşkil olunub.